وصل جاناں کی دل زار کو حسرت ہی رہی

وصلِ جاناں کی دلِ زار کو حسرت ہی رہی ۔۔۔ پر میسر نہ ہوا
عمر بھر جان پر فرقت کی مصیبت ہی رہی ۔۔۔ تھا یہ قسمت کا لکھا
تم نے جو بات کہی میں نے دل و جان سے وہ کی ۔۔۔ نہ کیا عذر کبھی
تم کو اس پر بھی مگر مجھ سے شکایت ہی رہی ۔۔۔ پھل یہ خدمت کا ملا
چشمۂ چشم سے اشکوں کی بھی موجیں نکلیں ۔۔۔ ٹھنڈی سانسیں بھی بھریں
آتشِ غم کی مگر دل میں حرارت ہی رہی ۔۔۔ نہ ہوا فرق ذرا
کھائیں سو مرتبہ قسمیں کہ ہوں عاشق تجھ پر ۔۔۔ نہیں اوروں پہ نظر
بدگمانی مگر اس شوخ کی عادت ہی رہی ۔۔۔ صاف مجھ سے نہ ہوا
ایک تم ہو کہ ہزاروں ہی کیے مجھ پہ ستم ۔۔۔ مل کے غیروں سے بہم
ایک میں ہوں کہ مجھے تم سے محبت ہی رہی ۔۔۔ کبھی شکوہ نہ کیا
دشمنوں نے تو بہت بات بنائی جا کر ۔۔۔ کہ وہ بگڑیں مجھ پر
حال پر میرے مگر ان کی عنایت ہی رہی ۔۔۔ کچھ کسی سے نہ ہوا
ہے تمہاری بھی عجب سخت طبیعت بخدا ۔۔۔ رحم دل میں نہ مزا
منتیں کرتے رہے ہم، تمہیں وحشت ہی رہی ۔۔۔ پاس بیٹھے نہ ذرا
منزلِ گور میں تنہا مجھے سب چھوڑ چلے ۔۔۔ اپنے بیگانے جو تھے
ساتھ دینے کو فقط اس کی عنایت ہی رہی ۔۔۔ اور کوئی نہ رہا
ہم نشیں اٹھ گئے اس بزم سے اپنے اکبرؔ ۔۔۔ تم بھی بس باندھو کمر
نہ وہ جلسے ہی رہے نہ وہ صحبت ہی رہی ۔۔۔ کیا ہے جینے کا مزا

اکبر الہ آبادی