ظرف عالی ہوں کہ بھر کر بھی کبھی چھلکا نہیں

ظرفِ عالی ہوں کہ بھر کر بھی کبھی چھلکا نہیں

ہوں وہ دریا جو کناروں پہ کبھی بہتا نہیں

ہوں وہ پیمانہ کہ محفل جس کو ہاتھوں ہاتھ لے

میں وہ نشہ ہوں جو سر چڑھ کر کبھی اترا نہیں

کشتِ ہستی! تُو مجھے پہچان، تیری آس ہوں

میں وہ بادل ہوں جو اب تک ٹوٹ کر برسا نہیں

خواب ہوں لیکن اگر تعبیر خود اپنی کروں

میں نہیں یا پھر مِری دنیا کا یہ نقشہ نہیں

دوں کسے آواز، اپنے آپ کو کیسے جگاؤں

تُو مِرے دل میں تو ہے لیکن مِری سنتا نہیں

اس فقیری میں بھی للچاتی ہے دنیا کی جھلک

میں کہوں کیسے کہ اس کے پاس سے گزرا نہیں

فاصلے قربت بنے، اب قربتیں ہیں فاصلہ

وہ جو پہلو میں ہے میرے دھیان میں آتا نہیں

دیکھتے ہو تم جسے ہر آن میرے ساتھ ساتھ

وہ مِری آشفتگی ہے، وہ مِرا سایہ نہیں

عزتِ سادات ہے محفوظ باقرؔ میرے پاس

میں وہ عاشق ہوں جو اب تک شہر میں رسوا نہیں

سجاد باقر رضوی