بیٹھے ہوئے ایک ایک کا منہ دیکھ رہے ہیں

بیٹھے ہوئے ایک ایک کا منہ دیکھ رہے ہیں

کہتے پھریں کس کس سے، جو دُکھ ہم نے سہے ہیں

جی کو تو وہ اچھے لگے پر ان کی عنایت

دُکھ ان سے بھلے ہیں کہ مِرے ساتھ رہے ہیں

کب تم سے گِلہ ہم نے کیا کم نِگہی کا

ہاں دیکھنے والوں نے کچھ افسانے کہے ہیں

سمجھانا تو ہم نے بھی بہت چاہا تھا دل کو

دل جیسے دِوانے کبھی قابو میں رہے ہیں

ہنسنے سے بھی سنتے ہیں کہ بھر آتی ہیں آنکھیں

اشکوں پہ نہ جاؤ کہ بہرحال بہے ہیں

پھولوں کی کٹوروں سے جہاں چھلکی ہے شبنم

کانٹوں کے بھی آنسو اسی مٹی پہ بہے ہیں

سوچوں کے خزانوں پہ بھی ناگوں کا ہے پہرا

دل چیز ہی کیا ہے، یہاں کعبے بھی ڈھہے

پوجو کہ تغافل کرو، دنیا ہے یہ لوگو

چڑھتے ہوئے سورج یہاں پَل بھر میں گہے ہیں

ادا جعفری