اک دوانے سے بھرے شہر کو جا لگتی ہے

اِک دِوانے سے بھرے شہر کو جا لگتی ہے

یہ محبت تو مجھے کوئی وبا لگتی ہے 

روز آتی ہے مِرے پاس تسلی دینے

شبِ تنہائی! بتا، تُو میری کیا لگتی ہے 

اِک فقط تُو ہے جو بدلا ہے دنوں میں ورنہ

لگتے لگتے ہی زمانے کی ہوا لگتی ہے

آنکھ سے اشک گِرا ہے، سو میاں! ہاتھ اٹھا

تارہ ٹوٹے پہ جو کی جائے دعا، لگتی ہے 

تیری آنکھوں کے ستاروں کے طفیل اے مِرے دوست

دشتِ پُر ہول کی ظُلمت بھی ضیا لگتی ہے

وہ جو مِلتی ہی نہیں عالمِ بیداری میں

آنکھ لگتے ہی مِرے سینے سے آ لگتی ہے

بات جتنی بھی ہو بے جا مگر اے شیریں سخن

جب تِرے لب سے ادا ہو تو بجا لگتی ہے

خوش گمانی کا یہ عالم ہے کہ فارسؔ اکثر

یار کرتے ہیں جفا، ہم کو وفا لگتی ہے

رحمان فارس