ظالم وہ تری پہلی نظر یاد رہے گی

ظالم! وہ تِری پہلی نظر یاد رہے گی

میں بھولنا چاہوں بھی مگر یاد رہے گی

اک قاتل و معصوم ادا نقش ہے دل پر

اک سادہ و پرکار نظر ۔۔ یاد رہے گی

ہونٹوں سے چھلکتا ہوا نازک سا تبسم

تابندگئ سلکِ گہر یاد رہے گی

برسات کا بھرپور سماں یاد رہے گا

زلفوں کی گھٹا تا بہ کمر یاد رہے گی

تجدیدِ مراعات کے دلچسپ بہانے

ہر پُرسشِ غم، بارِ دگر یاد رہے گی

ہر روز مناتے تھے جہاں جشنِ ملاقات

وہ راہ گزر۔۔ راہ گزر یاد رہے گی

آزردگئ شوق پہ اک خاص ادا سے

تسکیں بہ اشاراتِ نظر یاد رہے گی

پابندئ آدابِ محبت پہ وہ اصرار

فہمائشِ دزدیدہ نظر۔۔ یاد رہے گی

دل اپنی ہزیمت کو تو اب بھول چلا ہے

ہاں دوست! تِری فتح و ظفر یاد رہے گی

غلام ربانی تاباں