دل یگانہ ہے تو دلدار نے بخشا مجھ کو

دل یگانہ ہے تو دلدار نے بخشا مجھ کو

یہ صلہ دل سے مِرے یار نے بخشا مجھ کو

وقتِ جلوۂ نظارہ ۔۔ کہاں تھی مجھ میں

حوصلہ نرگسِ بیمار نے بخشا مجھ کو

عمر بھر  بادہ گساری کے بھرم کی خاطر

جام اک ساقیٔ پندار نے بخشا مجھ کو

پھول چنتے ہوئے گزری ہے مِری، اک  ایسا

راستہ وادیٔ پرُخار نے بخشا مجھ کو

فیصلہ دل کی عدالت  پہ جو رکھا ہے تو پھر

یار کو میں نے مِرے یار نے بخشا مجھ کو
داغِ ہر خونِ تمنا، غمِ دوراں، غمِ دل
ہائے کیا کیا نہ تِرے پیار نے بخشا مجھ کو
اس کو منسوب کیا لوحِ سخن سے میں نے
جو بھی شیرینئ گفتار نے بخشا مجھ کو
یہ تر و تازہ گلابوں سے مہکتے ہوئے شعر
ایک ہی پرتوِ دیدار نے بخشا مجھ کو

میں نے کچھ بھی تو چھپایا نہیں اسلمؔ راہی

کہہ دیا جو دلِ افگار نے بخشا مجھ کو

اسلم راہی