میں نے کہا کہ حسن کو اپنے چھپا کے رکھ
اس نے کہا تُو اپنی نگاہیں جھکا کے رکھ
میں نے کہا کہ دید میسر ہو کس طرح؟
اس نے کہا کہ آئینہ دل میں سجا کے رکھ
میں نے کہا کہ راہِ محبت ہے اور میں
میں نے کہا کہ چاہئے تھوڑا سا التفات
اس نے کہا مزاج نہ بادِ صبا کے رکھ
میں نے کہا کٹھن ہے بہت زیست کا سفر
اس نے کہا کہ عشق کو جادہ بنا کے رکھ
میں نے کہا کہ ہجر میں جلتا ہے یہ بدن
اس نے کہا جلے تو جلے دل بچا کے رکھ
میں نے کہا کہ وصل کا امکان ہے کبھی
اس نے کہا چراغِ تمنا جلا کے رکھ
میں نے کہا کہ بجھتا دِیا ہوں، خیال کر
اس نے کہا کہ سامنے خود کو ہوا کے رکھ
میں نے کہا کلام میں تاثیر کیوں نہیں
اس نے کہا کہ درد کو دل میں بسا کے رکھ
ناصرؔ مکالماتی غزل خوب ہے،۔ مگر
اس طرزِ خاص میں تُو قدم آزما کے رکھ
ناصر زیدی
No comments:
Post a Comment