دھوپ میں سایہ بنے تنہا کھڑے ہوتے ہیں

دھوپ میں سایہ بنے تنہا کھڑے ہوتے ہیں 

بڑے لوگوں کے خسارے بھی بڑے ہوتے ہیں

ایک ہی وقت میں پیاسے بھی ہیں سیراب بھی ہیں 

ہم جو صحراؤں کی مٹی کے گھڑے ہوتے ہیں

یہ جو رہتے ہیں بہت موج میں شب بھر ہم لوگ

صبح ہوتے ہی کنارے پہ پڑے ہوتے ہیں

آنکھ کھلتے ہی جبیں چومنے آ جاتے ہیں 

ہم اگر خواب میں بھی تم سے لڑے ہوتے ہیں

ہجر دیوار کا آزار تو ہے ہی، لیکن

اس کے اوپر بھی کئی کانچ جڑے ہوتے ہیں

اظہر فراغ