مسئلہ ہے کہ کچھ کیا جائے

مسئلہ ہے کہ کچھ کِیا جائے 

مسئلہ ہے کہ کیا کیا جائے

زندگی زہر کا پیالہ ہے 

مسئلہ ہے کہ یہ پیا جائے

پیراہنِ حیات ادھڑا ہے 

مسئلہ ہے کہ یہ سِیا جائے

سانس لینا بھی اک اذیت ہے 

مسئلہ ہے کہ یہ لیا جائے

بِن تمہارے جیا نہیں جاتا 

مسئلہ ہے کہ یوں جیا جائے

عشق دریا ہے آگ کا پھر بھی 

مسئلہ ہے کہ یہ کیا جائے

صحن دل میں وفا کا لاشہ ہے 

مسئلہ ہے کہ رو لیا جائے

پھول رکھ آئی ہوں کتابوں میں

مسئلہ ہے کہ پڑھ لیا جائے

شائستہ الیاس