وہ زندگی جو داد فنا مانگتی پھرے

وہ زندگی، جو دادِ فنا مانگتی پھِرے

مشکل جو آ پڑے تو دعا مانگتی پھرے

طوفان کی بہشت میں اس کا گزر کہاں

کشتی جو ساحلوں کی ہوا مانگتی پھرے

ہے اس نظر کو بھی تِری حسرت جو بے ادب

شب سے سکوں نہ دن سے ضیا مانگتی پھرے

موجِ ہوائے باغ الٹ دے اگر نقاب

نرگس تِری نظر سے حیا مانگتی پھرے

کیا یہ بھی کوئی عظمتِ آدم کی شرط تھی

دنیا بتوں سے فضلِ خدا مانگتی پھرے

کیا ہے اگر نہیں ہے یہ قحطِ شمیم و رنگ

کانٹوں سے بھیک بادِ صبا مانگتی پھرے

دامن نہ ہو تِرا تو حیاتِ برہنہ سر

کس کس سے روزِ حشر ردا مانگتی پھرے

شکرِ خدا کہ میں ہوں گدائے درِ رسولؐ

شاہوں کے در پہ میری بلا مانگتی پھرے

دانشؔ نہیں ہے جب تِرا دنیا سے واسطہ

کیوں تیری مغفرت کی دعا مانگتی پھرے

احسان دانش