اک آمر تخت پہ بیٹھا تھا
مِرے دریا جب نیلام ہوئے
اور بنجر میرے کھیت ہوئے
اک آمر تخت پہ بیٹھا تھا
مِرے لشکر کو جب مات ہوئی
اور دیس مِرا تقسیم ہوا
جب مذہب اک ہتھیار بنا
اور کلمہ گو ہی قتل ہوئے
اک آمر تخت پہ بیٹھا تھا
سچ بولنے والے لوگوں کو
جب کوڑے مارے جاتے تھے
اک آمر تخت پہ بیٹھا تھا
اک ظالم لشکر کے ہاتھوں
جب سورج اک مصلوب ہوا
اک آمر تخت پہ بیٹھا تھا
جب ایک بہادر عورت پر
اپنوں نے چھپ کر وار کیا
اک آمر تخت پہ بیٹھا تھا
جب گلیوں میں بارود بچھا
گھر گھر میں قتلِ عام ہوا
اک آمر تخت پہ بیٹھا تھا
راشد مراد
No comments:
Post a Comment