ہم تازہ گھٹن چھوڑ کے چھت پر نہیں جاتے

ماحول مناسب ہو تو اوپر نہیں جاتے

ہم تازہ گھٹن چھوڑ کے چھت پر نہیں جاتے

دیکھو مجھے اب میری جگہ سے نہ ہلانا

پھر تم مجھے ترتیب سے رکھ کر نہیں جاتے

بدنام ہیں صدیوں سے ہی کانٹوں کی وجہ سے

عادت سے مگر آج بھی کیکر نہیں جاتے

جس دن سے شکاری نے ادا کی کوئی منت

دربار پہ اس دن سے کبوتر نہیں جاتے

سو تم مجھے حیرت زدہ آنکھوں سے نہ دیکھو

کچھ لوگ سنبھل جاتے ہیں سب مر نہیں جاتے

دانش نقوی