آج کشمیر میں کیا مشق ستم جاری ہے

آج کشمیر میں

کیا کشمکشیں جاری ہیں

کیا مشق ستم

آئیں دیکھیں تو ذرا، آئیں سوچیں تو سہی

اک طرف ہندوکش کوہ گراں

اک طرف یو ایس اے

اک طرف شہ رگِ جاں

کوہِ ندا، شورِ گراں

دور تلک، دور تلک

آج کشمیر میں کیا مشقِ ستم جاری ہے

آئیں دیکھیں تو سہی، آئیں سوچیں تو سہی

ریڈ کراس آئے

کوئی دودھ، دوا اور غذا بھی لائے

پاؤں میں چپلیں اور سر کی رِدا بھی لائے

تتلیاں لٹتی ہیں آنگن میں

آنگن میں لہو بہتا ہے

آج کیوں کوچہ و بازار میں سنّاٹا ہے

یہ کوئی برجِ خلیفہ ہے نہ دہلی، نہ دمشق

کوئی تہران، نہ تیلوں کے ابلتے ہوئے

منہ زور کنوئیں

آئیں دیکھیں تو ذرا، آئیں سوچیں تو سہی

آج کشمیر میں کیا کشمکشیں جاری ہیں

بال و پر نوچتے ہیں

آنکھوں میں لہو ناچتا ہے

لوگ خاموش، زباں بند، اذانیں خاموش

ساری دنیا کی سیاست کی دوکانیں خاموش

آئیں دیکھیں تو ذرا، آئیں سوچیں تو سہی

یہ ہے سرسبز چناروں کا غزل خواں جنگل

یہ ہے سر سبز چناروں کی مہکتی وادی

اب کہیں، عدلِ جہاں نور و جہانگیر نہیں

اب کہیں پہلا سا وادئ کشمیر نہیں

نقاش کاظمی