نقش پا ڈھونڈیے دل پر کہ سبب یاد آئے

نقشِ پا ڈھونڈئیے دل پر، کہ سبب یاد آئے

کون یوں بھٹکا ہوا پھرتا ہے، اب یاد آئے

تِری سہمی ہوئی یادوں کے گلے لگتے ہوئے

کسی بے باک تمنا کے غضب یاد آئے

کیسی خوشبو سے دل و جاں میں شفق پھوٹ پڑی

کون چہرے مجھے اک خواب کی شب یاد آئے

جب کسی ساز، نہ آواز سے اچھا ہُوا دل

تیری خاموش مسیحائی کے ڈھب یاد آئے

قہر سا قہر مچا کوچۂ جاں میں ہر سُو

شدتِ تشنہ لبی، اور وہ لب یاد آئے

سیماب ظفر