دل سوالی نہ ہوا آنکھ تہی جام نہیں

دل سوالی نہ ہوا، آنکھ تہی جام نہیں

میری پہچان کوئی آرزوئے خام نہیں

دل کی تنہائی کا اندازِ سخن تو دیکھو

کونسی سانس ہے ایسے میں جو الہام نہیں

یاد کرنوں سے نکھرتے ہیں گُلابی لمحے

اس سحر میرے تعاقب میں کوئی شام نہیں

کون کہتا ہے کہ آنگن میں نہ اترا سورج

کیا یہی ساعتِ دز دیدہ تِرے نام نہیں

دل میں جو پھول کھلا جاں کے مقابل آیا

داستاں اور کوئی اتنی خوش انجام نہیں

آنچ ایسی کہ پگھل جاتی ہیں پتھر آنکھیں

ہے شعلۂ اظہار، تہِ دام نہیں

زہر نس نس میں اتر جائے تو فن کہلائے

ہم نے برتا ہے اداؔ جس کو وہ غمِ عام نہیں

ادا جعفری