محبت کے لیے تو سلسلہ ہونا ضروری ہے

 محبت کے لیے تو سلسلہ ہونا ضروری ہے

مُکرنے کے لیے بس حوصلہ ہونا ضروری ہے

ہوائیں زہر آلودہ ہوئی ہیں شہر کی اتنی

کہ ملتے وقت بھی کچھ فاصلہ ہونا ضروری ہے

یقیناً زندگی مشکل سفر ہے، آج جانا ہے

یہاں ہر موڑ پر اک حادثہ ہونا ضروری ہے

چلو تم توڑ دو عہدِ وفا، تم کو اجازت ہے

مری تقدیر کا اب فیصلہ ہونا ضروری ہے

تمہیں سب عیب اپنے خود نظر آ جائیں گے لیکن

تمہارے پاس ایسا آئینہ⌗ ہونا ضروری ہے

بدل سکتے ہو تم بھی رخ ہواؤں کا اشاروں سے

مگر اس کے لیے بھی تجربہ ہونا ضروری ہے

محسن کشمیری