خیال یار میں جو دربدر نہیں ہوئے ہیں

 خیالِ یار میں جو دربدر نہیں ہوئے ہیں

یقین مانئیے وہ با ہنر نہیں ہوئے ہیں

ہمیں دعاؤں کے کاسے میں جان ڈالنی ہے

ہمارے درد ابھی معتبر نہیں ہوئے ہیں

 پرائے لفظ کو ماتھے پہ لکھ دیا گیا ہے

کہ بیٹیوں کے یہاں کوئی گھر نہیں ہوئے ہیں

غمِ حیات نے گھیرا ہے یہ بجا، لیکن

ترے خیال سےتو بے خبر نہیں ہوئے ہیں

کہیں بلندی پہ ہم نے بھی آج ہونا تھا

تمہارے ہجر کے صدقے مگر نہیں ہوئے ہیں

فراق راتوں کے لمحے نہ پوچھئے مجھ سے

گزر رہے ہیں ابھی تک بسر نہیں ہوئے ہیں

پلٹ کے آنے کی تکلیف مستقل ہے کنول

کبھی بھی جانبِ منزل سفر نہیں ہوئے ہیں

افشاں کنول