ژالہ باری ہو رہی ہے موسمِ سرما کے بیچ
اور اس کی یاد آئی ہے شبِ یلدا کے بیچ
منجمد کرتے ہوئے لہجوں سے لڑنے کے لیے
مجھ کو اک جگنو ملا ہے سوچ کے صحرا کے بیچ
پڑ گئی اشنان کرتی اک کنیّا پر نظر
ہاتھ دل سے دھو لیے بہتی ہوئی گنگا کے بیچ
بیچتا ہوں نام رب کا، رام کا اور گاڈ کا
کر لی ہے دوکان مسجد، مندر و گرجا کے بیچ
میری مخبر دھڑکنوں نے مجھ کو آ کے دی خبر
ہاتھ تیرے خواب کا ہے نیند کے اغوا کے بیچ
اپنی ساری عمر کی حسرت مٹانی تھی ہمیں
چند گھڑیاں مل گئیں امروز اور فردا کے بیچ
غیر ممکن ہے نشہ اس آنکھ کا اترے کبھی
رقص کرتا دیکھ لے تجھ کو اگر برکھا کے بیچ
اس کے ہنسنے سے ہمارا ڈوبنا لازم ہوا
اک بھنور اُبھرا یکایک حسن کے دریا کے بیچ
اچھے اچھے لوگ آسی ہم سے پہلے جا چکے
کچھ نہیں باقی بچا ہمرے لیے دنیا کے بیچ
قمر آسی
No comments:
Post a Comment