سوال خواہش دل کو بھی زیر لب نہ کروں

 سوالِ خواہشِ دل کو بھی زیرِ لب نہ کروں

تِری رضا جو نہ ہو تجھ سے کچھ طلب نہ کروں

مِرے خیال کے مالک! تُو ہی بتا مجھ کو

تجھے میں یاد کروں کب میں یاد کب نہ کروں

یقین کر مجھے تیری اشد ضرورت ہے

تجھے تلاش تو میں یونہی بے سبب نہ کروں

تُو مالا مال کرے مجھ کو دولتِ غم سے

عطا کرے ہے مجھے میں دعا بھی جب نہ کروں

یہ میرے پاس جو اجداد کی امانت ہے

تو کیوں اسے میں سپردارئ نسب نہ کروں

ضیائے مہر بھی اپنی جگہ، مگر عابد

میں کفرِ حرمتِ تارِ رِدائے شب نہ کروں

عابد جعفری

آٹھواں سمندر