شعورِ ذات میں جو شر تلاش کرتے ہیں
وہ موتیوں میں بھی پتھر تلاش کرتے ہیں
کمال ہوش میں ہیں چند سر بریدہ لوگ
یہ اپنے دھڑ کے لیے سر تلاش کرتے ہیں
ہیں اک قبیل کے روشن خیال مینڈک ہم
کنوئیں میں رہ کے سمندر تلاش کرتے ہیں
جو پھڑپھڑاتے ہیں طائر اڑان سے پہلے
یہ بازوؤں پہ لگے پر تلاش کرتے ہیں
وہ جس کے صحن سے آتی تھی موتیے کی مہک
چل اپنے گاؤں میں وہ گھر تلاش کرتے ہیں
تِرے جو خط تِری ضد پر جلا دیئے تھے کبھی
ہم اپنی شیلف میں اکثر تلاش کرتے ہیں
یہ میرے چاروں طرف گھومتے ہوئے قیدی
مِری قمیض پہ نمبر تلاش کرتے ہیں
پھر اپنے آپ کو بھی ہم وہاں نہیں ملتے
جہاں پہ خود کو چھپا کر تلاش کرتے ہیں
بجائے چارہ گری کے یہاں کے لوگ حسن
ہر اک دکان پہ خنجر تلاش کرتے ہیں
احتشام حسن
No comments:
Post a Comment