ترس کسی کو تو آیا اسے بجھاتے ہوئے
دِیا جو تھکنے لگا روشنی لٹاتے ہوئے
اس ایک آنکھ پہ کتنے حسین مرتے تھے
جو آنکھ ٹوٹی تِرے خواب کو بچاتے ہوئے
تمہارے جانے کا صدمہ پڑا ہے اس دل کو
دھڑکنا چھوڑ بھی دیتا ہے غم مناتے ہوئے
کوئی تو بات مصور کو یاد آ گئی ہے
جو ہنس رہا ہے وہ تصویر کو بناتے ہوئے
مجھے یہ ڈر ہے کسی دن کسی مکان کے پاس
فقیر مارا نہ جائے صدا لگاتے ہوئے
کچھ ایسے شعر بھی ہوتے ہیں کیفیت والے
میں رو پڑوں گا کسی دن غزل سناتے ہوئے
میں تھک گیا ہوں مِری سانس رک گئی کاتب
یہ آنکھ خشک ہوئی تیرا دُکھ بہاتے ہوئے
سجاد کاتب
No comments:
Post a Comment