بہار گریہ شبنم کا راز کیا جانے

 بہار گریۂ شبنم کا راز کیا جانے

یہ اس سے پوچھ کہ دیکھے ہوں جس نے ویرانے

شریکِ بزم ہوئی جب سے چشمِ ساقی بھی

ہر ایک جام سے چھلکے ہزار مے خانے

تمام عالمِ امکاں شراب خانہ ہے

یہ اور بات ہے زاہد سبُو نہ پہچانے

نہ دیکھ اب مِرے ہونٹوں پہ مہر خاموشی

دئیے فریب ہزاروں تِری تمنا نے

ہمیں تو ہے مئے گلرنگ و گلرخاں سے غرض

بنائے کفر پڑی ہے کس طرح خدا جانے

بس اتنا یاد ہے اسرار وقتِ مے نوشی

کسی کی یاد بھی آئی تھی مجھ کو سمجھانے

اسرار ناروی

ابن صفی