ایمان جو پختہ ہو جائے جینے کا قرینہ آ جائے

عارفانہ کلام حمد نعت منقبت

ایمان جو پختہ ہو جائے، جینے کا قرِینہ آ جائے

طوفانِ حوادث مِٹ جائیں، ساحل پہ سفینہ آ جائے

اُس شمسِ منوّر کی تابش، گر سینہ بہ سینہ آ جائے

ذرّاتِ جہانِ دل چمکیں، دامن میں خزینہ آ جائے

پڑ جائے جو اُس کی دل پہ نظر، معراجِ محبت حاصل ہو

تقدیر منوّر ہو جائے،۔ تکمیل کا زینہ آ جائے

اُس ماہِ مبیں کی اُلفت میں، جو ڈُوب کے اُبھرے کیا کہنا

تسنیم کی موجیں پیدا ہوں،۔ ساحل پہ سفینہ آ جائے

لببک سے گُونجے دل کی زمیں، ہو گُنبدِ خضرا پیشِ نظر

قسمت سے خُدایا وہ ساعت،۔ وہ دن وہ مہینہ آ جائے

دامن جو نبیؐ کا مِل جائے، ٹل جائیں بلائیں سر سے نظیر

دروازۂ جنت کُھل جائے،۔ گُلزارِ مدینہ آ جائے

نظیر رضوی الہ آبادی

سید محمد نذیر حسن رضوی