بے چینی
کیا تم نے بے چینی کا حُلیہ دیکھا ہے
مکڑی کے جیسی ہوتی ہے
دیواروں پر جالے بُنتی رہتی ہے
بے ڈھبے جسم اور لمبی ٹانگوں والی مکڑی
صاف گھروں میں جانے کہاں سے گھس آتی ہے
دیکھتے دیکھتے اس کی ٹانگیں زیادہ لمبی ہو جاتی ہیں
دو کوہانوں والی ٹیڑھی میڑھی اونٹنی بن جاتی ہے
سرپٹ دوڑنے لگ جاتی ہے
اور جنگی صحراؤں کی سُرخی میں گھر نہلا جاتے ہیں
یہیں اگر یہ اونٹنی قابو ہو جائے تو ٹھیک
وگرنہ بڑھتے بڑھتے ڈائنو سار میں ڈھل جاتی ہے
شجر حجر گھر اور گھرہستی
اس کے پیروں کے نیچے روندے جاتے ہیں
آخر ڈائنوسار خود اپنے ہونے کی تکلیف سے جاں دینے لگتے ہیں
بے چینی رخصت ہوتی ہے
اور ہم نیا جنم لے کر جینے لگتے ہیں
سلطان ناصر
No comments:
Post a Comment