اب مجھے دنیا میں کوئی آشنا ملتا نہیں

اب مجھے دُنیا میں کوئی آشنا مِلتا نہیں

بے وفا مِلتا ہے لیکن با وفا ملتا نہیں

کیا خِزاں کا دور دورہ ہے چمن میں آج کل

کوئی پیغامِ بہارِ جاں فزا ملتا نہیں

سرحدِ ادراک سے ہے ماوراء رازِ خُودی

مبتداء ملتا ہے اُس کا، منتہا ملتا نہیں

کشتئ مِلّت کو طُوفاں میں بھی جو ثابت رکھے

دہر میں اب کوئی ایسا ناخدا ملتا نہیں

مِل گیا جو یار کوئی ہے سراسر نا سپاس

پاسدارِ خُوئے تسلیم و رضا ملتا نہیں

کس لیے یہ شکوۂ مایوسی و حِرماں بھلا؟

ہو اگر سچی تڑپ دل میں تو کیا ملتا نہیں

خُود خُدا کو ہے تلاشِ بندۂ عرفاں طلب

کون کہتا ہے کہ ڈھونڈے سے خُدا ملتا نہیں

آ رہی ہے دُور سے حماد! گُل بانگِ جَرس

منزلِ مقصود کا لیکن پتا ملتا نہیں

ابوالبیان حماد عمری

عبدالرحمان خان