کیسے بھلا وجود میں پھر تشنگی رہے

 کیسے بھلا وجود میں پھر تشنگی رہے

کچھ دیر پاس آدمی کے آدمی رہے

جگمگ کرے خیال تِرا میرے آس پاس

ہر وقتِ میرے دل میں تِری روشنی رہے

کچھ اور مانگتا ہوں کہاں میں حضور سے

چادر تِرے کرم کی یونہی اب تنی رہے

خوشبو تِرے وجود کو ہر سمت سے ملے

پھولوں کے ساتھ تیری سدا دوستی رہے

موسم نئے نئے بھی تِری زندگی میں ہوں

گزرے دنوں کی یاد بھی دل میں ہری رہے

جتنے بھی پھول ہیں یہاں سارے حسین ہیں

دل کے قریب آ کے مِرے کوئی بھی رہے

دیتا گیا ہے ایک دعا مجھ کو اجنبی

حاصل تجھے ہمیشہ ہی شاہد خوشی رہے

شاہد رحمان