کوچۂ عشق ترا طور نبھا بھی نہ سکوں

 کوچۂ عشق تِرا طور نِبھا بھی نہ سکوں

نہیں ایسا بھی کہ میں جان سے جا بھی نہ سکوں

زیست کے ہاتھوں مقید ہوا یوں طائرِ روح

قفسِ خاک سے چاہوں تو چُھڑا بھی نہ سکوں

یاد رکھنے کا نہیں پاس مِرے کوئی جواز

اور مجبور ہوں اتنا کہ بُھلا بھی نہ سکوں

ان کو کھو دینے کا حق بھی نہیں حاصل مجھ کو

شرط ہے یہ کہ کسی طور سے پا بھی نہ سکوں

تہی دستی نے مِری مجھ کو یوں معذور کیا

سرحدِ شب میں کوئی خواب اُگا بھی نہ سکوں

حوصلہ ٹوٹا ہے جا کر مِرا اس جا کہ جہاں

لوٹ کے آنے کی ہمت میں جُٹا بھی نہ سکوں

خواہشِ وصل کا اپنی میں کروں کیا صارم

’وہ تو خوشبو ہے اسے ہاتھ لگا بھی نہ سکوں‘

ارشد جمال صارم