گرچہ مسائے ہستی میں رنگ شفق نہیں

 گرچہ مسائے ہستی میں رنگِ شفق نہیں

تاہم سخن میں یاس کی کوئی رمق نہیں

نم یادِ رفتگاں میں ہوئی ہے کبھی کبھی

صحرا ہے چشم خشک مگر لق و دق نہیں

محصور اس کے خول میں تا عمر رہ سکوں

کیا اپنی ذات پر مِرا اتنا بھی حق نہیں؟

بدلے میں اس سے میں بھی کروں بے وفائیاں

میرے نصابِ عشق میں ایسا سبق نہیں

چاہو جہاں سے جب پڑھو، جب چاہے موڑ دو

شازی کتابِ زیست کا ایسا ورق نہیں

شہناز شازی