تیری آنکھیں تری صورت ترا چہرہ دیکھوں

 تیری آنکھیں تِری صورت تِرا چہرہ دیکھوں

دل بضد ہے کہ تِرے حسن کا جلوہ دیکھوں

تم جو اغیار سے بے پردہ مِلا کرتی ہو

چاند سے چہرے پہ دل کہتا ہے پردہ دیکھوں

مثلِ یوسف سرِ  بازار تو آؤں، لیکن

تیرے اندر بھی تو وہ کارِ زلیخا دیکھوں

دل کی معصوم سی خواہش ہے کئی برسوں سے

میں تجھے دیدۂ مجنوں سے ہی لیلٰی دیکھوں

میری ظالم سے فقط جنگ یہی ہے یارو

تنِ عریاں پہ مِری ضد ہے کہ کپڑا دیکھوں

اس لئے بھی ہے تعاقب میں ترے دل جاناں

کہ مقدر کو میں اپنا بھی سنورتا دیکھوں

جس کے سر پر نہ ہو سایہ اسے سایہ دے دوں

میں کہ روتے ہوئے بچوں کو بھی ہنستا دیکھوں

اس سے ہے کتنی محبت میں بیاں کیسے کروں

اس کے بس نام سے دل اپنا مچلتا دیکھوں

حق کی خاطر سرِ مقتل میں لڑوں اور سنگے

اور پھر نوکِ سناں پر میں سر اپنا دیکھوں

اکرم سنگے