جسم کے ساتھ مری روح بھی تپتی ہے مگر

 جسم کے ساتھ مِری روح بھی تپتی ہے مگر

کون ہو گا جو مِری روح کے اندر جھانکے

اک تحیر ہے مِری آنکھ میں جم کر بیٹھا

آنکھ کھولوں تو کناروں پہ سمندر جھانکے

میری آواز پہ پہرہ ہے مِری سوچ پڑھو

جس کو پڑھنا ہو پڑھے لفظ کے اندر جھانکے

میری کھڑکی سے نظر آتا ہے اک بوڑھا شجر

جس کی شاخوں سے کئی بار ہے چندر جھانکے

اپنی پہچان کو ڈھونڈا ہے مگر پا نا سکے

دشت و صحرا میں پھرے سات سمندر جھانکے

یہ جو الفاظ ہیں ورثے میں ملے ہیں عینی

میرے اجداد کے چہرے مِرے اندر جھانکے

عینی زا سید