ڈوب گیا ہے ایک ستارا آنکھوں میں
ٹھہر گیا ہے نقش تمہارا آنکھوں میں
پتھرائی ہیں آنکھیں غم کی شدت سے
رکا ہوا ہے موسم سارا آنکھوں میں
وہ لوگوں کے ساتھ ہنسی میں شامل تھی
پھیل گیا لیکن مسکارا آنکھوں میں
میں نے اس کی آنکھوں میں چہرہ دیکھا
اس نے اپنا روپ سنوارا آنکھوں میں
بہت دنوں سے ہم کو نیند نہیں آئی
تم نے کیسا خواب اتارا آنکھوں میں
چاروں جانب پانی کی پہنائی ہے
کہیں نہیں ہے کوئی کنارا آنکھوں میں
لیے ہوئے پھرتا ہوں ایک زمانے سے
تیرے چہرے کا لشکارا آنکھوں میں
افضال فردوس
No comments:
Post a Comment