حرص کے باعث گرفتارِ بلا پھرتے ہیں ہم
کچھ عجائب مخمصوں میں مبتلا پھرتے ہیں ہم
قافلہ سب ساتھیوں کا حیف آگے بڑھ گیا
خاک اڑاتے دشت میں مثلِ صبا پھرتے ہیں ہم
یاں کوئی ہمراز ہے اپنا نہ کوئی ہم سخن
چپکے چپکے اپنی دھن میں جا بجا پھرتے ہیں ہم
نیک ہو یا بد کسی سے بھی نہیں اپنا بگاڑ
اور بظاہر یوں تو سب سے ہی خفا پھرتے ہیں ہم
شامتِ اعمال سے پڑتے ہیں جب ادبار میں
پھر بھلا کب صورتِ تیر قضا پھرتے ہیں ہم
گردشِ ایام نے یاں تک ہمیں چکرا دیا
کچھ نہیں معلوم سر پھرتا ہے یا پھرتے ہیں ہم
سب بھلے ہیں پر کسی سے کچھ خدا ڈالے نہ کام
مانگتے شبیر! در در یہ دعا پھرتے ہیں ہم
سید علی شبیر
No comments:
Post a Comment