باب شکستگی سے گزارا گیا مجھے

بابِ شکستگی سے گُزارا گیا مُجھے

مجبوریوں کے نام پہ ہارا گیا مجھے

پہلے کیا گیا مجھے یکتائے رنگ و بُو

پھر رنج کی تہوں میں اُتارا گیا مجھے

تو اضطراب میں ہی لیا ہو گا مِرا نام

ورنہ کبھی سکوں میں پکارا گیا مجھے؟

ماتھے پہ لکھ دیا گیا اُس خُوش ادا کا ہجر

اور ہجر کے دروں میں سنوارا گیا مجھے

پیروں کو روکتی رہی آوازِ رفتگاں

صحرائے خاک و خُوں میں اُتارا گیا مجھے

اک پل صراطِ بخت سے مجھ کو لپیٹ کر

چھاؤں میں ڈال ڈال کے مارا گیا مجھے

اب مجھ میں ڈھونڈئیے نہ نشاں شہرِ ذات کا

ہجرت کے روزنوں میں نتھارا گیا مجھے

اس سے بھی دل کا ساتھ کوئی دیر ہی رہا

جس، خواب کے فسُوں میں اُتارا گیا مجھے

بے ماجرہ نہ ہونے دیا دل نے واقعہ

حالانکہ لاکھ اس پہ اُبھارا گیا مجھے

آئلہ طاہر