آقائے مدینہ ہی لجپال ہمارے ہیں

 عارفانہ کلام حمد نعت منقبت

آقائے مدینہﷺ ہی لجپال ہمارے ہیں

سرکارؐ کے منگتوں میں سب چاند ستارے ہیں

توصیف کی رم جھم ہیں آیاتِ خداوندی

مِدحت کی لیے ٹھنڈک قرآن کے پارے ہیں

کل شب مِرے آنگن میں طیبہ کی ہوا اتری

ساون کی گھٹائیں ہیں، رحمت کے اشارے ہیں

کیا تجھ کو بتاؤں میں احوالِ درِ آقاﷺ

کیا خوب مدینہ ہے کیا خوب نظارے ہیں

گلزارِ مدینہ میں خوشبو نے خبر دی ہَے

جگنو یہ تمہارے ہیں، یہ پھول تمہارے ہیں

بپھری ہوئی یہ موجیں ہاتھوں میں اٹھا لیں گی

نکلے تو سہی کشتی ہر سمت کنارے ہیں 

یہ سب ہے کرم اُنؐ کا، یہ سب ہے عطا اُنؐ کی

دوری میں حضوری کے لمحات گزارے ہیں

للہ کرم کیجیے،۔ للہ کرم کیجیے

سب آپؐ کی چوکھٹ پر دکھ درد ہمارے ہیں

سرکارؐ کے قدموں سے ہر گز نہ ریاض اٹھنا

دنیا کے تعاقب میں ہر وقت خسارے ہیں

ریاض حسین چودھری