دل کا کوئی سیلف میڈ آسمان تھا

 دل کا کوئی سیلف میڈ آسمان تھا

نہ اسے کوئی وراثتی زمین ملی 

یہ معرفت کی ہواؤں کا والی ہے

یہ یاسیت کی مملکت کا شہزادہ ہے

جُھومتے جُھومتے رُک جائے

اور چلتے چلتے ہانپنے لگے

کارپوریٹ یا ہارمونل 

جزویات کو کاٹتا عشق کرتے کرتے

کبھی یہ رُخصت پر چلا جائے

تو کبھی سامنے رہتے ہوئے بھی بیکار رہ جائے

اور کبھی ورک فرام ہوم کرتے ہوئے 

ٹارگٹ حاصل کر جائے

اس دل کے پاس بہت سے راز ہیں

بہت سے اندھیرے ہیں

جن کے ساتھ وہ عشرت کی تاویل کرتا ہے

کئی حادثے ہیں اور کئی معرکے ہیں 

جن کے ساتھ وہ جوا کھیلتے ہوئے ہارا ہے 

کئی دھوکے ہیں اور بہت سے سچ ہیں

جن کے ساتھ یہ بہلتا رہا ہے

یہ دل بے قابو قیدی کی طرح ہے

آزادی کا طلب گار ہے 

لیکن قید کو جُھومر بھی سمجھتا ہے 

کبھی کسی محبت کی جُھرمٹ میں چھپ جاتا ہے

اور کبھی کسی نفرت کے کُہرام میں ماتمی بن جاتا ہے

کچھ لمحوں کے لیے یہ کسی کے حوالے ہو جائے

اور پھر حرفِ مدحت پر مشتمل ایک قالین بن جائے

جس پر بیٹھ کر یہ ویزا فری محسوس کرتا ہے

یہ آزادی کے کالے پانی کا قیدی یے

دل کو نسیان نہیں ہے، لیکن یہ بُھول چکا 

قیمتِ دل چہ بود؟

نودان ناصر