لاریب یہاں اور عقبٰی میں اک ان کے کرم کا

 عارفانہ کلام حمد نعت منقبت

لا ریب یہاں اور عقبٰی میں اک ان کے کرم کا سایہ ہے

محبوبِ خداﷺ رحمت بن کر ہر دو عالم پر چھایا ہے

جو خلقِ خدا کا ہے سرورﷺ ہے حشر کے داور کا دلبر

وہ حُسنِ سراپا، نازشِ کُل، اہلِ دل کا سرمایہ ہے

ہیں خُلق پہ انس و جاں قرباں، ایک ایک ادا کے متوالے

اوصافِ نبیﷺ کی خُوشبو نے سارا عالم مہکایا ہے

روشن تھے نہ یوں آفاق کبھی سرکارؐ کی آمد سے پہلے

خود ان کے لیۓ ہی خالق نے ہر ذرے کو چمکایا ہے

یہ گلشنِ ہستی کی زینت انﷺ کی مرہونِ منّت ہے

اک آمدِ شاہ ﷺ سے دنیا پر کیا ابرِ سکینت چھایا ہے

کرتی ہیں وضو آنکھیں ان کی، اشکوں سے سدا اس بستی میں

کیسا انﷺ کے مشتاقوں کا فرقت میں دل بھر آیا ہے

حسنینؑ کا نانا، بابا ہے وہ سیدہ فاطمہؑ زہرا کا

دنیا میں انہی کے ناموں کا ہر سُو جھنڈا لہرایا ہے

اللہ کے پیارے ناموں کے اور ذکرِ مبیں کے بعد سدا

زینب نے نبیﷺ کا ذکرِ مبیں ہونٹوں کا وِرد بنایا ہے

سیدہ زینب سروری قادری