ہے امت رسول سے جنت بھری ہوئی

 عارفانہ کلام حمد نعت منقبت

ہے اُمتِ رسولﷺ سے جنت بھری ہوئی

جنت میں ہے رسولﷺ کی امت بھری ہوئی

معمور دل ہے یادِ شہِ مشرقینﷺ سے

اس گھر میں دو جہاں کی ہے دولت بھری ہوئی

میں افصح العربﷺ کا ثناء گو ہوں دوستو

کیوں کر نہ ہو سخن میں فصاحت بھری ہوئی

پاتے تھے لوگ خطبۂ احمدﷺ سے لذتیں

کیا بات بات میں تھی حلاوت بھری ہوئی

ہے قُدسیانِ خاص کو بھی آپؐ سے خلوص

دل میں ہے ہر ملک کے ارادت بھری ہوئی

آزاد پر بھی ہو نگہِ لطف یا رسولﷺ

ہے دل میں آرزوئے شفاعت بھری ہوئی

ابوالکلام آزاد