کاسے میں ایک فقیر کے رکھا گیا مجھے
صدقہ سمجھ کے دل سے اُترا گیا مجھے
اک عشق رفتہ رفتہ ہنستا گیا مجھے
اک ہجر اپنے آپ میں کھاتا گیا مجھے
مثلِ گُلاب شاخ سے توڑا گیا مجھے
پھر یوں ہُوا، کتاب میں رکھا گیا مجھے
مجنوں نے میرے صبر و تحمل کو داد دی
اتنا ہجوم عام میں پرکھا گیا مجھے
لوگوں میں ہو رہی ہیں بہت چہ میگوئیاں
شاید کسی مزار پہ دیکھا گیا مجھے
صحرا نے اپنے دامن وسعت میں دی پناہ
تنہائیوں کا شور بساتا گیا مجھے
رنج و الم نے قوتِ بینائی چھین لی
دُنیا خیالِ یار بُھلاتا گیا مجھے
مُردہ تیرا وجود ہے زندہ ہے تیرا نفس
کاندھا ہلا ہلا کے بتایا گیا مجھے
محور! میرا وجود اسی میں ملا دیا
جس خاک مُشت بھر سے بنایا گیا مجھے
محور سرسوی
No comments:
Post a Comment