امی لقب سے علم برہان نعت ہے

 عارفانہ کلام حمد نعت منقبت

اُمی لقب سے عَلَّمَ بُرہانِ نعت ہے

اقرأ باسم ربک اعلانِ نعت ہے

وہ پہلا نعت گو وہی سلطانِ نعت ہے

ہر نعت گو رعیّتِ عمرانِؑ نعت ہے

بنیادِ مدحِ سید الابرارﷺ ہے درود

فرمانِ کردگار میں فرمانِ نعت ہے

شق القمر دو باٹ کی صورت بٹے ہوئے

دستِ الہُٰ العدل میں میزانِ نعت ہے

پیغمبرِؐ حیات ہیں سرکارِؐ دوجہاں

"ہر شعبۂ حیات میں امکانِ نعت ہے"

جس نعت میں علیؑ و محمدﷺ کی بات ہو

وہ کائناتِ نعت میں سلمانِؑ نعت ہے

اظہارِ کُل صفاتِ الہٰی انہی ص سے ہے

اب اس کے بعد جو بھی ہے میدانِ نعت ہے

حرفِ دعا ہے آیۂ خیرالجزا کے بعد

مجھ کو جزا کی مد میں بھی ارمانِ نعت ہے

دنیا ادب سے لیتی ہے جو نعت گو کا نام

کوئی ہنر نہیں ہے یہ احسانِ نعت ہے

پہلی اذانِ اسمِ محمدﷺ تھی عرش پر

دراصل کعبہ دوسرا ایوانِ نعت ہے

قرآں کہو، صحیفہ کہو، کوئی نام دو

دیوانا جانتا ہے یہ دیوانِ نعت ہے

دل سے دعائیں دیجیے مدحِ رسولؐ پر

خاموشی اس مقام پہ کفرانِ نعت ہے

یہ داستان عشق ہے کارِ جہاں نہ جان

لکھنے سے پہلے یہ بتا، ایمانِ نعت ہے؟

طیبہ سے ہو کے جاتے ہیں ہم سوئے کربلا

ہر شاہراہِ عشق خیابانِ نعت ہے

اکبر میں اس کے ہاتھ پہ بیعت ابھی کروں

جس کو بھی اس زمانے میں عرفانِ نعت ہے

حسنین اکبر