نوک مژہ پہ اشک بہ عنوان نعت ہے

 عارفانہ کلام حمد نعت منقبت

نوکِ مژہ پہ اشک بہ عنوانِ نعت ہے

یعنی سخن کی ذیل میں امکانِ نعت ہے

وہ حرفِ سبز کاش عطا ہو کبھی مجھے

میں جس کو کہہ سکوں کہ یہ شایانِ نعت ہے

جز مدحِ شاہؐ جو بھی ہے کاغذ پہ بوجھ ہے

خامے کا ننگ ہے یہ جو نسیانِ نعت ہے

اس کے ہر ایک لفظ پہ افسوس کیجیے

جس کی بیاض بے سرو سامانِ نعت ہے

تشنہ لبی کو بوسۂ نعلین چاہیۓ

دل کی تپش کا توڑ یہ بارانِ نعت ہے

احساں ہے عالمین پہ میلادِ مصطفیٰؐ

یہ کائنات اصل میں ایوانِ نعت ہے

رحمت ہیں وہ تمام جہانوں کے واسطے

"ہر شعبۂ حیات میں امکانِ نعت ہے"

مجھ ایسے بے ہُنر کو پنہ مل گئی اسد

کتنی کُشادگی سرِ دامانِ نعت ہے

خاور اسد