حاصل ہے مجھ کو درس ثنا اس نصاب سے

 عارفانہ کلام حمد نعت منقبت

حاصل ہے مجھ کو درسِ ثنا اس نصاب سے

مشہور ہے جہاں میں جو اُم الکتاب سے

صدقہ عطا ہو حضرت حسانؓ کا شہاﷺ

دربار عالی جاہ سے، عالی جناب سے

جاتا ہے سوئے مرکزِ انوار روز کیوں

مقدور ہو تو پوچھے کوئی آفتاب سے

لکھنا ہے خار گُلشنِ طیبہ کی دل کشی

ہے رابطہ ضروری مسلسل گُلاب سے

امّی لقب وہی ہے، وہی شہرِ علم بھی

اک روشنی ہے پُھوٹ رہی ہے حجاب سے

میں نے بھی خاکِ طیبہ سے چہرہ سجا لیا

نکلا ہے مہتاب اگر آب و تاب سے

نعتوں میں کچھ تو شانِ رفعنا کا عکس ہو

ہے تربیت ضروری خدا کی کتاب سے

دعویٰ نبیؐ کے عشق کا ان کو بھی ہے جنہیں

مطلب ثواب سے ہے نہ ڈر ہے عذاب سے

آقاﷺ کو اپنی مثل کہے اور کہاں چلے

کھارے کو میٹھا کر کے دکھاؤ لعاب سے

ٹکڑے کرے جو چاند کے سونا پہاڑ کو

نسبت نظیر کی ہے اسی شاہِ نابؐ سے

واحد نظیر