آپ سے جو ملا ہدایت ہے

 عارفانہ کلام حمد نعت منقبت

آپﷺ سے جو مِلا ہدایت ہے

آپﷺ نے جو دیا وہ رحمت ہے

آپﷺ کی شان ہی نِرالی ہے

آپﷺ کو سوچنا عبادت ہے

آپﷺ سا کوئی بھی نہیں آقاﷺ

آپﷺ کی ہر ادا عنایت ہے

آپﷺ کا نام کس قدر میٹھا

مِیم سے ہر طرف محبت ہے

آپﷺ کی پُھونک کا کرشمہ ہے

آج بھی خُون میں حرارت ہے

آپﷺ کا چھوڑ کے درِ اقدس

غیر سے جوڑنا بغاوت ہے

آپﷺ ہیں چاشنی کے پیغمبرﷺ

آپ ﷺسے چار سُو حلاوت ہے

آپﷺ ہی آخری نبیﷺ رب کے

آپﷺ کے بعد بس قیامت ہے

آپﷺ کی جُوتیوں سے بھی ہلکی

فارس و روم کی حکومت ہے

آپﷺ کا شکریہ نہیں ممکن

آپﷺ کی ہر دُعا میں اُمت ہے

آپﷺ ہی ڈھونڈ لیں گے عابی کو

سامنے کی تو کس میں ہمت ہے

عابی مکھنوی