دیکھو یہ کیسا مطلع عنوان نعت ہے

 عارفانہ کلام حمد نعت منقبت

دیکھو یہ کیسا مطلعِ عُنوانِ نعت ہے

نُورِ خُدا کے سامنے دِیوانِ نعت ہے

اس دورِ ابتلاء میں بھی حسّانِ نعت ہے

وہ شخص جس کے پاس قلمدانِ نعت ہے

کلیاں، گُلاب، چاند، ستارے، یہ روشنی

اس کائناتِ ارض پہ احسانِ نعت ہے

اپنے کرم سے مجھ کو عطا کیجیۓ حضورؐ

اک حرف ایسا حرف جو شایانِ نعت ہے

حرف و قلم کی آبرو ہے آپؐ کے طفیل

شعر و ادب کا نُور تو دِیوانِ نعت ہے

صلِ علیٰ کی گونج مہکتی ہے ہر طرف

سارا جہان جیسے گُلستانِ نعت ہے

اعجاز احمد