یہ سچ ہے اس کا رنج میں چہرہ عجیب تھا

 یہ سچ ہے اُس کا رنج میں چہرہ عجیب تھا 

ہنستے ہوئے مگر وہ زیادہ عجیب تھا 

مجھ پر اُسے یقیں ہُوا تاخیر سے تو کیا

پہلے پہل سبھی کا عقیدہ عجیب تھا 

برسوں پُرانا زخم بھی لمحوں میں بھر گیا 

اُس دلفریب شخص کا بوسہ عجیب تھا 

سینہ زنوں کے ہاتھ ہوا میں ٹھہر گئے

گِریہ تِرے اسِیر کا اتنا عجیب تھا 

پہلی نظر میں ہی کوئی دل میں اُتر گیا 

جیون میں بس یہ ایک ہی لمحہ عجیب تھا 

دونوں کی ایک شام بھی گُزری نہیں تھی ساتھ 

پھر بھی تمام شہر میں چرچا عجیب تھا 

رمیکا منال