مد و جذر حیات کا سامان نعت ہے

  عارفانہ کلام حمد نعت منقبت

مد و جذر حیات کا سامانِ نعت ہے

یہ ساری کائنات ہی اِمکانِ نعت ہے

قُرآن ہے گواہ؛ بُلندی کے ذِکر میں

کیا اس سے بھی زیادہ کوئی شانِ نعت ہے

سیرت رسولِ پاکﷺ کی پیشِ نظر رہے

یہ جانِ نعت ہے، یہی اِیمانِ نعت ہے

بس اک نگاہِ شوق ہے اور میری چشمِ نم

میرے لیے تو ہاں یہی سامانِ نعت ہے

میں اور لب کُشا کروں ایوانِ نعت میں

حسّانؓ شاہ زادۂ ایوانِ نعت ہے

محسن، امیر اور رضا عندلیب ہیں

یہ ہند کی زمین بھی بُستانِ نعت ہے

تکمیلِ دِیں کا حُکم ہے اس امر کی دلیل

"ہر شعبہ حیات میں اِمکانِ نعت ہے"

تنظیم الفردوس