اک کہانی سفر میں چھوڑ آئے
زندگانی سفر میں چھوڑ آئے
کُچھ سنبھالا گیا نہ اُلفت میں
ہر نشانی سفر میں چھوڑ آئے
دیکھتے کیا ہو میرے چہرے کو
ہم جوانی سفر میں چھوڑ آئے
بھوک سے جب مَرے تو یاد آیا
دانہ پانی سفر میں چھوڑ آئے
یاد رکھنے کو یہ بھی کافی تھا
رُت سُہانی سفر میں چھوڑ آئے
غم کا دریا تو دل میں ٹھہرا تھا
اور روانی سفر میں چھوڑ آئے
عشق میں ہم نے بار ہا گوہر
خاک چھانی سفر میں چھوڑ آئے
گوہر فرید
No comments:
Post a Comment