خدا نے جہاں میں اتارے محمد

 عارفانہ کلام حمد نعت منقبت

خدا نے جہاں میں اتارے محمدﷺ

نبی آخری ہیں ہمارے محمدﷺ

دکھایا ہے رب نے تو اپنا ہی جلوہ 

ہیں دونوں جہاں کے سہارے محمدﷺ

ہے خوش بخت وہ ایک جھولی کہ جس میں

مِرے پیارے رب نے اتارے محمدﷺ

حلیمہ ہے نازاں نصیبوں پہ اپنے 

کہ آنگن میں کھیلے دلارے محمدﷺ

تصور میں میرے ہے کعبے کی رونق

دلوں میں بسے ہیں ہمارے محمدﷺ

درودوں کو اوڑھوں، میں جاؤں مدینے

جہاں سو رہے ہیں دُلارے محمدﷺ

مچلتی ہے حسرت کہ طیبہ کو دیکھوں

جہاں لائے کیا کیا نظارے محمدﷺ

وہ شق القمر کا ہوا معجزہ جب 

تو کافر بھی اس دم پکارے محمدﷺ

انہیں عرش کے سب نظارے دکھا کر

بتایا کہ یہ ہیں ‌تمہارے محمدﷺ

پڑھیں اُن کی مُٹھی میں پتھر بھی کلمہ

رہ رہ پکاریں، ہیں پیارے محمدﷺ

جہاں کی حقیقت، ہے ختم نبوتﷺ

جہاں سارا بس اب پکارے محمدﷺ

یہی ہے عقیدت، یہی ہے محبت

ہر اک ذرہ بولے؛ ہمارے محمدﷺ

مجھے آئے آواز محشر میں شاہیں

تِری آخرت کو سنوارے محمدﷺ

ہے شاہین جو ڈوبنے کو سفینہ

لگائیں گے اس کو کنارے محمدﷺ

نجمہ شاہین کھوسہ