عشق نبی ہے حاصل جاں مدعائے دل

 عارفانہ کلام حمد نعت منقبت

عشقِ نبیؐ ہے حاصلِ جاں مدعائے دل

دل مبتلائے جاں رہے، جاں مبتلائے دل

تسکین پائے بھی تو بھلا کیسے پائے دل

خاکِ رہِ مدینہ ہے میری دوائے دل

جس دن سے دل یہ خلوتئ عشقِ شاہؐ ہے

ہستی ہے ایک شورشِ ہنگامہ زائے دل

ہے ذکر ان کا محفلِ امکاں میں رنگِ بزم

ہے ان کی یاد جوشِ بہارِ فضائے دل

کیا جانیں عشقِ شہؐ میں ہے دل رہنمائے شوق

یا ہے یہ جذبِ شوق میرا رہنمائے دل

دل کے وجود سے ہے سراسر بقائے عشق

عشقِ حبیب پاکﷺ ہے یکسر بقائے دل

یا رب فغاں میں اتنی تو دے جاذبیتیں

یا رب مدینہ تک تو رسا ہو نوائے دل

قدموں سے دور یا شہِؐ لولاک تا بہ کے

سختی مفارقت کی کہاں تک اٹھائے دل

دل کی نزاکتوں پہ ہے بنیادِ کائنات

فطرت نے عشقِ شاہؐ پہ رکھی بنائے دل

نامی کو یہ عطیۂ عشقِ رسولﷺ ہے

یہ درد صبح و شام الہیٰ دکھائے دل

منظور حسن نامی