ہم ہیں بندے اور تو معبود ہے

 عارفانہ کلام حمد نعت منقبت

ہم ہیں بندے اور تُو معبود ہے

تیری ذاتِ پاک ہی محمود ہے

دیکھنے والی نگاہیں بھی تو ہوں

اس کا جلوہ ہر جگہ موجود ہے

تیری قدرت کی کوئی حد ہی نہیں

عقلِ انسانی مگر محدود ہے

لائقِ سجدہ نہیں ہے کوئی ذات

صرف تیری ذات ہی مسجود ہے

ہو وہ تیرا ذکر یا تیرا خیال

جانِ ایماں حاصلِ مقصود ہے

جس عبادت میں خلوصِ دل نہ ہو

وہ عبادت بے اثر بے سود ہے

ہر گھڑی رونق رہے اس کا خیال

بس اسی میں آپ کا بہبود ہے

رونق بدایونی