جو نصیب ہو تو شمار ہو یہ نیاز مایۂ ناز میں

 عارفانہ کلام حمد نعت منقبت

جو نصیب ہو تو شمار ہو یہ نیاز مایۂ ناز میں 

کہ لگی ہو خاکِ در حضورؐ مری جبینِ نیاز میں 

یہ ہے اپنا حالِ دلِ حزیں غمِ عشقِ شاہِ حجاز میں 

کہ برنگِ شمع تمام عمر کٹی ہے سوز و گداز میں 

جو ہر ایک دل میں اثر کرے وہ کلامِ شاہِ انامؐ ہے 

کہ جسے عظیم خدا کہے وہ ہے خلق بندہ نواز میں 

کوئی حسن و عشق چھپائے کیا کہ ہے ایک دونوں کا خاصہ 

وہ ہے خود فروش خدا نما وہ نیاز میں تو یہ ناز میں 

کہیں لعل ہے تو کہیں گہر، کہیں شمس ہے تو کہیں قمر 

یہ اسی کا حسن ہے جلوہ گر جو نہاں ہے پردۂ راز میں 

جو بشر ہے شانِ بشر سے دور تمام خلق ہے جس کا نور 

یہ وہی حقیقتِ معتبر ہے عیاں لباسِ مجاز میں 

رخِ مصطفیٰﷺ ہے وہ آئینہ کہ اب ایسا دوسرا آئینہ 

نہ کسی کی بزمِ خیال میں نہ دکانِ آئینہ ساز میں 

تِرا وصفِ حسن ہو کیا ادا تِری ہر ادا ہے وہ جاں فزا

 کہ ہزاروں غنچۂ دل کھلے تِرے اک تبسمِ ناز میں 

دمِ حمد سجدۂ مصطفیٰﷺ یہ نیاز ہے کہ ناز ہے 

پئے اذانِ بخششِ عاصیاں سرِ عجز و خم ہے نیاز میں 

تِری ذات کا تو ہے ذکر کیا تِرے ذکر کا ہے یہ مرتبہ 

کہ بجائے مہرِ قبولِ حق ہے درود تجھ پہ نماز میں 

تِری ذات شانِ کمالِ رب، تِرا حسن ہے وہ مہِ عرب 

کہ سوئی سی شے ملی وقتِ شب تِرے اک تبسمِ ناز میں 

انہیں کوئی رنج و تعب نہیں وہ ہر اک بلا سے الگ رہے 

کہ جو سب کو چھوڑ کے آ گئے تِرے دامِ زلفِ دراز میں 

درِ مصطفیٰﷺ پہ جو سر رکھا تو ندا دی ہاتفِ وقت نے 

تِرے وہ بھی سجدے ادا ہوئے جو قضا ہوئے تھے نماز میں 

وہ ہے کون جس کے اشارہ پہ ہوا کعبہ قبلۂ انس و جاں 

جو پسند ربِ علیٰ ہوئی وہ ادا تھی کس کی نماز میں 

تِرے لطف کی ہے یہ آرزو کہ نہ جائے حشر میں آبرو 

مِرے پردہ پوش چھپا لے تو اسے اپنے دامنِ ناز میں 

رخِ مصطفیٰؐ ہے وہ آئینہ کہ اب ایسا دوسرا آئینہ 

نہ کسی کی بزمِ خیال میں نہ دکانِ ائینہ ساز میں

مفتی اکرام احمد لطف بدایونی